Hungama Hai Kyun Barpa by Akbar Allahabadi :Ghazal (Urdu)

-
         غزل
ہنگامہ ہے کیوں برپا
      تھوڑی سی جو پی لی ہے،
ڈاکا تو نہیں ڈالا
       چوری تو نہیں کی ہے۔

نا تجربہ کاری سے
        واعظ کی یہ باتیں ہیں،
اس رنگ کو کیا جانے
        پو چھو تو کبھی پی ہے۔

اس مے سے نہیں مطلب
       دل جس سے ہے بیگانہ،
مقصود ہے اس مے سے
       دل ہی میں جو کھنچتی ہے۔

اے شوق وہی مے پی
       اے ہوش ذرا سو جا،
مہمانِ نظر اس دم

       ایک برق تجلی ہے۔

واں دل میں کہ صدمےدو
       یاں جی میں کہ سب سہہ لو،

ان کا بھی عجب دل ہے

      میرا بھی عجب جی ہے۔

ہر ذرہ چمک تا ہے

     انوار الٰہی سے،
ہر سانس یہ کہتی ہے
     ہم ہیں تو خدا بھی ہے۔

سورج میں لگے دھبا

     فطرت کے کرشمے ہیں،
بت ہم کو کہیں کافر

     الله کی مرضی ہے۔

تعلیم کا شور ایسا

     تہذیب کا غل اتنا،
برکت جو نہیں ہوتی

     نیت کی خرابی ہے۔

سچ کہتے ہیں شیخ اکبرؔ

     ہے طاعتِ حق لازم،
ہاں ترکِ مے و شاہد

     یہ ان کی بزرگی ہے۔

            اکبرالٰہ آبادی 



 مشکل الفاظ:
     ☆ واعظ ۔۔۔۔۔ اچھی باتیں بتانے والا۔
     ☆ رنگ ۔۔۔۔۔ مزا، لطف۔
     ☆ مے ۔۔۔۔۔ شراب
     ☆ بیگانہ ۔۔۔۔۔ انجانا۔
     ☆ مقصود ۔۔۔۔۔ مطلب، ارادہ۔
     ☆ شوق ۔۔۔۔۔ آرزو، خواہش، چسکا، اُمنگ۔
     ☆ مہمانِ نظر ۔۔۔۔۔ آنکھوں کا مہمان، آنکھوں کا پیارا۔
     ☆ اس دم ۔۔۔۔۔ اس پل۔
     ☆ برق تجلی ۔۔۔۔۔ بجلی کی روشنی (محبوب کا چمکتا چہرہ).
     ☆ واں ۔۔۔۔۔ وہاں۔
     ☆ صدمہ ۔۔۔۔۔ دکھ۔
     ☆ یاں ۔۔۔۔۔ یہاں۔
     ☆ انوار الٰہی ۔۔۔۔۔ خدا کا نور، روشنی۔
     ☆ فطرت ۔۔۔۔۔ مزاج۔
     ☆ کافر ۔۔۔۔۔ خدا کا انکار کرنے والا۔
     ☆ تہذیب ۔۔۔۔۔ کلچر، ادب۔
     ☆ غل ۔۔۔۔۔ ہنگامہ، چیخم، پکار۔
     ☆ برکت ۔۔۔۔۔ نعمت، زیادتی، فائدہ۔
     ☆ نیت ۔۔۔۔۔ دل کی بات۔
     ☆ شیخ ۔۔۔۔۔ صوفی۔
     ☆ طاعتِ حق ۔۔۔۔۔ عبادت کا حق۔
     ☆ لازم ۔۔۔۔۔ ضروری۔
     ☆ ترک ۔۔۔۔۔ چھوڑنا۔
     ☆ مے و شاہد ۔۔۔۔۔ شراب اور محبوب۔
              ●●●