Hue Naamvar Benishaan by Ameer Meenai: Ghazal (Urdu)

۔
         غزل
ہوئے نام ور بے نشاں کیسے کیسے،
زمیں کھا گئی آسماں کیسے کیسے۔

تری بانکی چتون نے چن چن کے مارے،
نکیلے سجیلے جواں کیسے کیسے۔

نہ گل ہیں نہ غنچے نہ بوٹے نہ پتے،
ہوئے باغ نذرِ خزاں کیسے کیسے۔

یہاں درد سے ہاتھ سینے پہ رکھا،
وہاں ان کو گزرے گماں کیسے کیسے۔

ہزاروں برس کی ہے بڑھیا یہ دنیا،
مگر تاکتی ہے جواں کیسے کیسے۔

ترے جاں نثاروں کے تیور وہی ہیں،
گلے پر ہیں خنجر رواں کیسے کیسے۔

جوانی کا صدقہ ذرا آنکھ اٹھاؤ،
تڑپتے ہیں دیکھو جواں کیسے کیسے۔

خزاں لوٹ ہی لے گئی باغ سارا،
تڑ پتے رہے باغباں کیسے کیسے۔

امیرؔ اب سخن کی بڑی قدر ہو گی،
پھلے پھولیں گے نکتہ داں کیسے کیسے​۔

            امیر مینائی



مشکل الفاظ:
     ☆ نام ور---- نام والا۔     ☆ چتون---- نظر، ترچھی نگاہ۔     ☆ غنچے---- کلی۔     ☆ خزاں---- پتجھڑ۔     ☆ گماں---- شک، غلط فہمی، غرور۔     ☆ جاں نثار---- جان دینے والا۔     ☆ رواں---- ذاری، عادت۔     ☆ صدقہ---- بلا ٹالنے کے لیۓ دی گئی خیرات۔     ☆ سخن---- ادب، زبان۔     ☆ نکتہ داں---- باریکی دیکھنے والا۔
------------------------------------------