Gul Tera Rang Chura Laye Hain by Ahmad 'Nadeem': Ghazal (in Urdu)

              -

               غــــــز ل

گُل   تیرا   رنگ   چُرا    لائے    ہیں    گُلزاروں   میں

جل  رہا   ہوں   بھری   برسات   کی   بوچھاروں   میں

مجھ  سے  کترا  کے  نکل  جا  مگر  اے   جانِ    حیا

دِل  کی  لو  دیکھ   رہا   ہوں  تیرے   رُخساروں   میں

حُسنِ     بیگانہِ      احساسِ       جمال      اچھا      ہے

غنچے  کِھلتے  ہیں  تو  بِک جاتے  ہیں  بازاروں  میں

میرے  کِیسے میں تو اک سُوت  کی انٹی  بھی  نہ  تھی

نام    لکھوا    دیا    یوسف    کے     خریداروں     میں

ذکر   کرتے   ہیں   تیرا   مجھ    سے    با عنوانِ   جفا

چارہ گر   پھول    پِرو    لائے    ہیں    تلواروں    میں

زخم  چُھپ  سکتے ہیں  لیکن  مجھے  فن  کی  سوگندھ

غم  کی  دولت  بھی  ہے  شامل  میرے  شاہکاروں  میں

منتظر       ہے       کوئ      تیشہ       تخلیق     اُٹھائے

کتنے   اصنام     ابھی     دفن     ہیں    کہساروں    میں

مجھ   کو   نفرت  سے  نہیں  پیار  سے  مصلوب   کرو

میں   بھی  شامل  ہوں   محبت   کے    گنہگاروں   میں

رُت    بدلتی    ہے     تو    معیار     بدل    جاتے    ہیں

بُلبلیں    خار    لئے    پھرتی     ہیں     منقاروں     میں

چُن    لے    بازارِ  ہُنر    سے    کوئی    بہروپ     نؔدیم

اب    تو    فنکار   بھی   شامل    ہیں    اداکاروں    میں

         احمد  نؔدیم  قاسمی

مشکل الفاظ:

     ☆ گلزار ۔۔۔۔۔ باغیچہ۔

     ☆ رخسار ۔۔۔۔۔ گال۔
     ☆ جمال ۔۔۔۔۔۔ خوبصورتی۔
     ☆ غنچہ ۔۔۔۔۔ کلی۔
     ☆ کیسا ۔۔۔۔۔ تھیلا، جھولا۔
     ☆ انٹی ۔۔۔۔۔ سوت یا ریشم کی لچھی۔
     ☆ یوسف ۔۔۔۔۔ ایک نبی یا پیغمبر جو مصر کے بازار میں بیچے گئے تھے۔
     ☆ با عنوان ۔۔۔۔۔ نام دیکر۔
     ☆ جفا ۔۔۔۔۔ بےوفائی۔
     ☆ چارہ گر ۔۔۔۔۔ علاج کرنے والا، راستہ دکھانے والا۔
     ☆ فن ۔۔۔۔۔ ہنر۔
     ☆ شاہ کار ۔۔۔۔۔ انوکھی ایجاد، ماسٹر پیس۔
     ☆ منتظر ۔۔۔۔۔ انتظار میں۔
     ☆ تیشہ ۔۔۔۔۔ بت تراشنے کی چھینی۔
     ☆ تخلیق ۔۔۔۔۔ بنانا، وجود میں لانا۔
     ☆ اصنام ۔۔۔۔۔ بت، صنم کی جمع۔
     ☆ کہسار ۔۔۔۔۔ پھاڑی سلسلہ۔
     ☆ مصلوب ۔۔۔۔۔ سولی پر چڑھانا۔
     ☆ معیار ۔۔۔۔۔ کسوٹی، پیمانہ، پرکھ۔
     ☆ خار ۔۔۔۔۔ کانٹا۔
     ☆ منقار ۔۔۔۔۔ چونچ۔
     ☆ اداکار ۔۔۔۔۔ اداکاری یہ ایکٹنگ کرنے والا۔

----------------------------------------------