Sau baar chaman mahka by Sufi Tabassum: Ghazal(in Urdu)

          غزل
سو بار چمن مہکا، سو بار بہار آئی،
دنیا کی وہی رونق، دل کی وہی تنہائی۔

اک لحظہ بہے آنسو، اک لحظہ ہنسی آئی،
سیکھے ہیں نئے دل نے اندازِ شکیبائی۔

یہ رات کی خاموشی یہ عالمِ تنہائی،
پھر درد اٹھا دل میں پھر یاد تری آئی۔

اس عالمِ ویراں میں کیا انجمن آرائی،
دو روز کی محفل ہے اک عمر کی تنہائی۔

رونے سے کیا ہے حاصل اے دل سودائی،
اس پار بھی تنہائی اس پار بھی تنہائی۔

اس موسمِ گل ہی سے بہکے نہیں دیوانے،
ساتھ ابرِ بہاراں کے وہ زلف بھی لہرائی۔

ہر دردِ محبّت سے الجھا ہے غمِ ہستی،
کیا کیا ہمیں یاد آیا جب یاد تری آئی۔

چرکے وہ دیئے دل کو محرومیٔ قسمت نے،
اب ہجر بھی تنہائی اور وصل بھی تنہائی۔

جلوؤں کے تمنّائی جلوؤں کو ترستے ہیں،
تسکین کو روئیں گے جلوؤں کے تمنّائی۔

دیکھے ہیں بہت ہم نے ہنگامے محبّت کے،
آغاز بھی رسوائی، انجام بھی رسوائی۔

دنیا ہی فقط میری حالت پہ نہیں چونکی،
کچھ تیری بھی آنکھوں میں ہلکی سی چمک آئی۔

اوروں کی محبت کے دہرائے ہیں افسانے،
بات اپنی محبت کی ہونٹوں پہ نہیں آئی۔

افسونِ تمنّا سے بیدار ہوئی آخر،
کچھ حسن میں بے باکی کچھ عشق میں زیبائی۔

وہ مست نگاہیں ہیں یا وجد میں رقصاں ہے،
تسنیم کی لہروں میں فردوس کی رعنائی۔

آنکھوں نے سمیٹے ہیں نظروں میں ترے جلوے،
پھر بھی دلِ مضطر نے تسکین نہیں پائی۔

سمٹی ہوئی آہوں میں جو آگ سلگتی تھی،
بہتے ہوئے اشکوں نے وہ آگ بھی بھڑکائی۔

یہ بزمِ محبّت ہے، اس بزمِ محبّت میں،
دیوانے بھی شیدائی، فرزانے بھی شیدائی۔

پھیلی ہیں فضاؤں میں اس طرح تری یادیں،
جس  سمت  نظر اُٹّھی  آواز  تری  آئی۔

اک ناز بھرے دل میں یہ عشق کا ہنگامہ،
اک گوشائے خلوت میں یہ دشت کی پنہائی۔

ان مدھ بھری آنکھوں میں کیا سحر تبسّم تھا،
نظروں میں محبت کی دنیا ہی سمٹ آئی-

      (صوفی غلام مصطفٰی تبسم)



مشکل الفاظ:
     ☆ رونق // چمک، زینت۔
     ☆ لحظہ // لمحہ، پل۔
     ☆ شکیبائی // صبر، برداشت۔
     ☆ عالم // آس پاس کا علاقہ، دنیا۔
     ☆ انجمن // محفل، جلسہ، مجلس.
     ☆ آرائی // سجانا، سنوارنا۔
     ☆ ابر // بادل، گھٹا۔
     ☆ سودائی // جنونی، پاگل، دیوانہ۔
     ☆ آرائی // سجانا، سنوارنا۔
     ☆ غمِ ہستی // زندگی کا غم۔
     ☆ چرکے // ہلکا زخم، خراش۔
     ☆ محروم // کمی ہو جانا۔
     ☆ ہجر // جدائی۔
     ☆ وصل // ملن، ایک ہونا۔
     ☆ تسکین // چین، اطمینان، دلاسہ۔
     ☆ آغاز // شروعات، ابتدا۔
     ☆ رسوائی // بےعزتی، ذلالت۔
     ☆ انجام // نتیجہ، آخر، انتہا۔
     ☆ فقط // صرف، بس۔
     ☆ افسانے // داستان، قصے، کہانیاں۔
     ☆ افسون // جادو، ٹونا، منتر۔
     ☆ بیدار // جاگنا، حرکت میں آنا، ہوشیار، خبردار۔
     ☆ بے باکی // بے خوفی، گستاخی، سر کشی۔
     ☆ زیبائی // حسن، خوبصورتی۔
     ☆ وجد // سر مستی، بے خودی۔
     ☆ رقصاں // جھومنے میں مست۔
     ☆ تسنیم // جنت کی ایک نہر۔
     ☆ فردوس // جنت۔
     ☆ رعنائی // خوبصورتی، حسن۔
     ☆ جلوے // رونق، جھلک، دیدار۔
     ☆ مضطر // بیچین، بیتاب۔
     ☆ بزم // محفل، جلسہ۔
     ☆ شیدائی // دیوانہ، فدا۔
     ☆ فرزانے // عقلمند، دانشور
     ☆ فضاؤں // زمین آسمان کے بیچ کی جگہ۔
     ☆ گوشہ // کونا۔
     ☆ خلوت // تنہائی۔
     ☆ دشت // جنگل، ویران علاقہ۔
     ☆ پنہائی // کھلا پن۔
     ☆ سحر // صبح سے پہلے کا وقت، بھور۔
     ☆ تبسّم // مسکراہٹ، مسکان۔
               ●●●