Kamar bandhein hue chalne:Ghazal by Insha Allah Khan (in Urdu)

۔
               غزل

کمرباندھے ہوئےچلنےکو یاں سب یاربیٹھے ہیں،

بہت آگے گئے  باقی جو  ہیں  تیار  بیٹھے  ہیں۔

نہ  چھیڑ   اے  نکہتِ   بادِ  بہاری  راہ   لگ  اپنی،
تجھےاٹھکھیلیاں سوجھی ہیں ہم بیزار بیٹھےہیں۔

تصورعرش  پر  ہے اور سر ہے پائے ساقی  پر،
غرض کچھ اوردُھن میں اس گھڑی میخواربیٹھے ہیں۔

یہ اپنی چال ہے اُفتادگی سے اب کہ پہروں  تک،
نظر  آیا  جہاں   پر  سایۂ   دیوار    بیٹھے   ہیں۔ 

بسانِ   نقشِ   پائے   رہرواں   کوئے    تمنّا    میں،
نہیں اٹھنے کی طاقت کیا کریں لا چار بیٹھے ہیں۔

کہاں صبر  و  تحمّل  آہ  ننگ و نام کیا  شے  ہے،
یہاں رو پیٹ کر ان سب کو ہم یکبار بیٹھے ہیں۔ 

نجیبوں کا عجب کچھ حال ہے اس دور میں یارو،
جہاں پوچھو  یہی کہتے ہیں ہم بیکار  بیٹھے ہیں۔

کہیں بوسے کی مت جراَت دلا کر  بیٹھیو  ان  سے،
ابھی اس حد کو وہ کیفی نہیں ہوشیار بیٹھے ہیں۔ 

نئی یہ وضع  شرمانے کی سیکھی آج  ہے تم نے،
ہمارے پاس صاحب ورنہ یوں سو بار بیٹھے ہیں۔

بھلا گردش  فلک  کی چین  دیتی  ہے کسے  انشاؔء،
غنیمت ہے کہ ہم صورت  یہاں دو چار بیٹھے ہہیں۔ 

                انشاءاللہ خان انشاؔء

     نوٹ— انشاء االلہ خاں کے اصل دیوان میں شعر نمبر 3، 4 اور 6 کچھ بدلے ہوئیں ہیں جو کی آگے دیئے گئے ہیں، لیکن اوپر غزل میں اشعار کی وہی شکل دی گئی ہے جو لوگوں میں صدیوں سے مقبول ہے۔ یہ پتہ نہیں چلتا کہ یہ ترمیم بعد میں خد انشاء نے کی تھی یا کسی اور نے۔
     خیال  ان کا  پرے   ہے  عرشِ اعظم  سے  کہیں  ساقی،
     غرض کچھ اور دھُن میں اس گھڑی میخوار بیٹھے ہیں۔

     یہ اپنی چال ہے اُفتادگی سے ان دنوں پہروں،
     نظر  آیا  جہاں   پر  سایۂ  دیوار  بیٹھے  ہیں۔

     کہیں ہیں صبر کس کو آہ  ننگ و نام کیا شے  ہے،
     غرض رو پیٹ کر ان سب کو ہم یکبار بیٹھے ہیں۔

مشکل الفاظ:
     ☆ نکہت // خوشبو
     ☆ بادِ بہاری //  موسمِ بہار میں چلنے والی ہوا۔
     ☆ بیزار // خفا، ناخوش، اُکتایا ہوا۔
     ☆ تصّور // خیال، دھیان۔
     ☆ عرش // آسمان۔
     ☆ پائے // پیر۔
     ☆ ساقی // شراب پلانے والا یا والی۔
     ☆ غرض // مقصد۔
     ☆ میخوار // شرابی، نشے میں۔
     ☆ اُفتادگی // آفت، مصیبت۔
     ☆ پہروں // ایک دن یا رات کا چوتھائی حصہ۔
     ☆ بسانِ // ملتے جلتے۔
     ☆ نقشِ پائے // پیروں کے نشان۔
     ☆ رہرواں // راہ میں چلنے والے۔
     ☆ کوئے تمنّا // تمنا کی گلیوں میں۔
     ☆ تحمل // سہن کرنا، تکلیف اُٹھانا، صبر۔
     ☆ آہ // کراہنے يا تکلیف کی آواز۔
     ☆ ننگ // ننگا، برہنہ، مفلس، حیثیت۔
     ☆ نام //  شہرت۔
     ☆ شے //  اہم چیز۔
     ☆ نجیب // خاندانی، شریف، نیک۔
     ☆ بوسے //  چمبن، پیار۔
     ☆ جرأت // دلیری، بہادری۔
     ☆ حد // انتہا، آخر۔
     ☆ کیفی // مستی میں، نشے میں۔
     ☆ وضع // بناوٹ، ساخت۔
     ☆ گردش // گھومنا، چکر، حرکت۔
     ☆ فلک // آسمان۔
     ☆ عرش اعظم // سات آسمانوں میں سب سے اونچا آسمان۔

                   ●●●

                              ----------