Kal chaudhvi ki raat thi by Ibne Insha (Ibne Insha)
۔
غزل
کل چودھویں کی رات تھی شب بھر رہا چرچا تیرا،
کچھ نے کہا یہ چاند ہے کچھ نے کہا چہرا تیرا۔
ہم بھی وہیں موجود تھے ہم سے بھی سب پوچھا کیے،
ہم ہنس دئیے ہم چپ رہے منظور تھا پردہ تیرا۔
اس شہر میں کس سے ملیں ہم سے تو چھوٹیں محفلیں،
ہر شخص تیرا نام لے ہر شخص دیوانا تیرا۔
کوچے کو تیرے چھوڑ کر جوگی ہی بن جائیں مگر،
جنگل ترے پربت ترے بستی تری صحرا تیرا۔
ہم اور رسم بندگی آشفتگی افتادگی،
احسان ہے کیا کیا ترا اے حسن بے پروا تیرا۔
بے شک اسی کا دوش ہے، کہتا نہیں خاموش ہے،
تو آپ کر ایسی دوا، بیمار ہو اچھا تیرا۔
دو اشک جانے کس لیے پلکوں پہ آ کر ٹک گئے،
الطاف کی بارش تری اکرام کا دریا تیرا۔
اے بے دریغ و بے اماں ہم نے کبھی کی ہے فغاں،
ہم کو تری وحشت سہی ہم کو سہی سودا تیرا۔
تو باوفا، تو مہرباں، ہم اور تجھ سے بدگماں،
ہم نے تو پوچھا تھا ذرا، یہ وصف کیوں ٹھہرا تیرا۔
ہم پر یہ سختی کی نظر ہم ہیں فقیر رہ گزر،
رستہ کبھی روکا ترا دامن کبھی تھاما تیرا۔
ہاں ہاں تری صورت حسیں لیکن تو ایسا بھی نہیں،
اک شخص کے اشعار سے شہرہ ہوا کیا کیا تیرا۔
بے درد سننی ہو تو چل کہتا ہے کیا اچھی غزل،
عاشق ترا رسوا ترا شاعر ترا انشاؔ تیرا۔
مشکل الفاظ:
☆چودھویں۔۔۔ پورا چاند۔
☆شب۔۔۔ رات۔
☆صحرا۔۔۔ ریگستان۔
☆رسم بندگی۔۔۔ غلامی کی رسم۔
☆آشفتگی۔۔۔ پریشانی، دیوانگی۔
☆افتادگی۔۔۔ خاکساری، ٹوٹ جانا۔
☆حسن بے پروا۔۔۔ دھیان نہ دینے والی خوبصورتی۔
☆دوش۔۔۔ کمی، غلطی۔
☆اشک۔۔۔ آنسووں۔
☆الطاف۔۔۔ مہربانی، نوازش۔
☆اکرام۔۔۔ کرم کی جمع، کرم کرنا۔
☆دریا۔۔۔ ندی۔
☆بے دریغ۔۔۔ کھلے دل والا، انکار نہ کرنے والا، سخی۔
☆بے اماں۔۔۔ حکم نہ چلانے والا۔
☆فغاں۔۔۔ شور مچانا، واویلا کرنا۔
☆وحشت۔۔۔ جنون، پاگلپن۔
☆سودا۔۔۔ دھن، ضد، خبط، دیوانگی۔
☆تو باوفا۔۔۔ وفا کرنے والا۔
☆مہرباں۔۔۔ مہربانی یا کرم کرنے والا۔
☆بدگماں۔۔۔ بد گمانی کرنا، غلط خیال رکھنا۔
☆وصف۔۔۔ خوبی، صفت، بناوٹ۔
☆فقیر رہ گزر۔۔۔ راستے کا فقیر۔
☆حسیں۔۔۔ خوبصورت۔
☆شخص۔۔۔ انسان
☆اشعار۔۔۔ شعر کی زمین۔
☆شہرہ۔۔۔ چرچا، شہرت۔
☆بے درد۔۔۔ سنگ دل، ظالم۔
☆رسوا۔۔۔ بےعزت، ذلیل۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Comments
Post a Comment